Tuesday, September 30, 2008

سؤال الاسبوع ارجنتيني

ما هو الفعفوط.....؟!؟

Labels: , , , , ,

posted by EXzombie at 3:26 PM | link | 14 comments

Monday, September 29, 2008

عيد الاكل و البلعة

كل عام و انتو بخير
و عيد اكل مبارك عليكم
و يا ريت تزهبون عياديكم
المهم شنو راح اتريقون الصبح.....؟!؟

انا راح اسوي لي جبدة مقلية بالتوست، و بيض و طماط و بصل مع شرائح جبن الشيدر

الجبدة سهلة، احمص توست و افتته، و بعدين اييب شوية طحين و بابريكا و اخلطهم مع بعض، و احط لي بادية فيها بيض، اقطع الجبدة لقطع متوسطة الحجم و بعدين اغمسها بالبيض و اقطها بخلطة التوست المحمص و الطحين و البابيركا
بعد ما تصير قطع الجبدة جنهم طايحة بملعب رمل تقطونها بالمقلة و انتوا و مزاجكم، تحبون الجبدة ميديوم رير، و لا ميديوم ويل، و لا حكوكة




و بالهنا و الشفا
البيض سهل، بس احب اتحرش و اشرح لأني فاطر اليوم على سيجار و بيبسي


تييبون زبدة لورباك، الزبدة الدنماركية المعتمدة حصريا بالبلوغ، و تقطونها بالمقلة، و تييبون 3 بيضات تفصلون البياض عن الصفار... الطماط تقصصونه شرايح مثل ملوت الارنب الجائع مو مثل هارديز

الطماط هم تقدرون على المشتهى تحشونه جبن ابيض و تقطونه بالفرن اذا لكم خلق




و البصل تخلونه مكعبات صغيرة (لازم البصل ابيض علشان لما يتحمر) بالنسبة حق تقصيص البصل اكتشفت من التجارب العزابية انه احسن طريقة حق تقطيع البصل من غير دموع اهو ان تكون معاكم سكجينة حادة، و تقصون الراس اول شي و اخر شي تخلون الجذر لأنه مصنع الدموع هناك، و تقدرون تحطون البصلة بالثلاجة قبل لا تستخدمونها او انكم تغطسونها بالماي شوي قبل لا اتقطعونها، طبعا في حلول ثانية يمكن ما لها فعالية مثل الي ذكرتهم لكم، تقدرون تاكلون بصل و انتو تقطعون، او تاكلون خبز او تلبسون لكم قناع و تفتكون


تقطون ثلاث شرايح طماط بس احنا مو قاعدين نسوي زلاطة، و تصفونهم يم بعض، و بعدين تصبون صفار البيض و خلوه طبقة، بعدين ييبوا البصل و رشوه فوق الصفار،بعدين صبوا البياض فوقهم، و ييبوا الحين جبن السلايس و غطوا الحوسة الي جدامكم فيه، و اذا تقدرون غطوا المقلاة علشان يستوي البيض بسرعة
الجبدة و البيض تاكلونهم مع خبز ايراني مسمسم، و دقوس بو ديج، و البيض لا تحطونه بصحن، خلوه بالمقلاة، علشان محد له خلق يغسل صحون من وراكم
و بالهنا و الشفا
انا مو الشيف رمزي، يعني لحد يتفلسف على راسي
تحديث
وصلني ايميل من وحدة مستحية، و ما تبيني احط اسمها، لأنه بلوغي للحين شبهة
الوحدة هذي تسئلني ليش ما يبت طاري الملح في تحضير طبق "الشكشوكة"، و ردي هو
اولا الشكشوكة السعودية غير و البيض الي اسويه غير، اهم يسوون بيض و طماط و يسمونه شكشوكة، و انا اسوي بيض و طماط و بصل و جبن و اسميه بيض و طماط و بصل......!!!؟
و على طاري الملح، انا مرتفع عندي الضغط هالجم يوم 150 على 100 و كافي علي الدقوس
و انتو حطوا ملح على حسب الذوق

Labels: , , ,

posted by EXzombie at 11:00 PM | link | 18 comments

Thursday, September 18, 2008

سؤال الاسبوع عنصري

الخوال ليش ما عندهم بلوغات.....؟!؟

Labels: , ,

posted by EXzombie at 12:40 PM | link | 40 comments

Tuesday, September 16, 2008

لو سمحت شكو مو عايد الدي في دي......؟!؟



الحلقة الثانية من سلسلة اختراعات لم تغير مجري الحياة على الكرة الارضية


dvd rewinder

ابتلشت بالشباب... كلما خذا واحد منهم فلم منك رجعه مو معيود.....!!!؟
مالك خلق تعيد الفلم من الاول.......!!!؟

حلك الوحيد و السريع وفرته لك ما ادري شنو اسم الشركات الحين برعصة وحدة تقدر تشوف الديفيدي يفتر و ينعاد من الاول......!!!؟
طبعا لأنه التكنولوجيا هذي ثورية فللحين ما قدروا ينزلون جهاز 2 في واحد يقدر يعيد السي دي و الديفيدي، يعني الي يبي يعيد السي دي لازم يشتري له الجهاز الخاص باعادة السي دي لونه فضي و موجود بالصورة الاولى علشان لا تضيعون، و الي يبي يعيد الديفيدي عنده الخضر الي هني، يمع ربعك و خلهم ينصدمون من منظر الديفيدي و اهو يفتر و ينعاد من الاول.......!!!؟
الاجهزة هذي مو غشمرة ترى صج موجودين و ينباعون بعد

Labels: , , , ,

posted by EXzombie at 4:10 AM | link | 8 comments

Thursday, September 04, 2008

سؤال الاسبوع

ما هو الحيوان الذي كان يعد من النباتات؟
الجائزة ربابة طبعا

Labels: ,

posted by EXzombie at 12:26 AM | link | 14 comments

Wednesday, September 03, 2008

ماش بطاط مخبوز بالفحم

مستغربين العنوان... لا تحاتون
استكمالا لبرنامجنا الرمضاني اليوم راح اقدم فقرة أسهل ألذ الاكلات
مستوى صعوبة اكلة اليوم تساوي مسألة حسابية بالابتدائي، و الاكلة هذه حقيقية و ليست للدعابة، و هي طريقتي المعتمدة و الخاصة في اعداد البطاطا المشوية
المقادير
  1. قصدير
  2. فحم شيشة
  3. دوة صغيرة
  4. بطاط على عداله يفضل يكون من الحجم المتوسط و انت و مدة ايدك يعني مو مهم العدد تقدر تسوي وحدة او تقدر تسوي مليون
  5. ملح
  6. زبدة لورباك او اي زبدة دينماركية مو مهم الزبدة مالحة و لا لا المهم تكون دينماركية
  7. زيت الذرة دلال

طريقة التحضير

تمسك البطاطة بايدك، مو مهم وايد ان غسلتها و لا لا لأنه راح يعطي طعم، و بسكين علم على البطاطة بحقد او العب اكس او (نفعتني الطريقة هذي وايد)، الاسهل انك تسطر 3 خطوط متوازية على سطح البطاطة و بعدين امسح بالزبدة عليها بكل كرم و لا تحاتي السعرات الحرارية (قشرة البطاطا ستكون عنصر اساسي في اعطاء الاكلة الطعم المميز)، بعدين افرك البطاطة بزيت الذرة دلال و خلها تلمع من الزيت، اضف قليلا من الملح او شوية بهارات و جبن اذا تبي تمصخها، لف البطاطة بالقصدير كليا و لا تكشف اي جزء منها

الحين اشرح لكم الاسم شوي قبل لا استكمل التحضير

ماش بطاط و مخبوز بالفحم

اذا كنت تبي ماش بطاط خل البطاطة بالقصدير اتشرب شوي، و بعدين ييب لك صحن او الخشبة مالت التقصص او اي شي يابس، و البطاطة على الطاولة حط الصحن فوقها، اضغط بلطف، و بعدين حط حمك و زورك عليها، و اهرس البطاطة بس مو تطشرها، يعني انت بس تبيها تفرش شوي علشان ينكشف الجزء الداخلي من البطاطة و تتشرب اللورباك و زيت دلال، اتركها ترتاح بعد كورس التعذيب

للنقنقة تقدر تييب لك خلطة مكسرات قلوب، و تلفهم بالقصدير و تقطهم بالفحم، و اسحبهم متى ما بغيت

نرجع لطريقة التحضير لأني يعت

نجهز الفحم بنفس التكنولوجيا و التكنيك المتبع لتحضير فحم او ولعة للشيشة، وزع الفحم بالتساوي على الدوة، و اذا حايشك فسق، ييب ذرة كاملة باللحاء و القشر و قطها بالنار، تييب كرات القصدير المحشوة بالبطاطا و ترميها بالنار جيدا، او تقدر تيمعهم بالزاوية و تخليهم يستوون بالراحة، على حسب قوة النار بامكانك تركها من نصف ساعة الى ساعة كاملة، استطلع بين الفينة و الاخرى عن حال البطاط عن طريق غرس اي شي في البطاط و كلما كانت المقاومة اكثر كلما احتاجت وقتا اطول حتى تصل للحالة السائحة

طريقة الاكل

على فرضية انكم كنتو ماكلين من قبلها و مو ناطرين البطاط علشان تفطرون، و بعد ان تصل لمرحلة السيحان، تاخذ كرة القصدير، و تحطها بصح و دير بالك و انت تقشر القصدير علشان لا تحرق روحك، بامكانك اضافة دقوس بو ديج ان كنت من ربع الحار و ما يحوشك قرحة، و اكل كل شي بما فيه الجلد و الاماكن السوداء المتفحمة الي قد تنتج من طول مدة التعرض للفحم، يمكنك استخدام الشوكة او القفشة، و لكن يمنع استخدام صلصة الطماط او الكتشب حتى لو كان هاينز الاخضر، لأنه راح يخرب الطعم

و بالهنا و الشفاء

حلقة الطبخ القادمة

ستير فرايد بلاليط (مقلية) مع تونة قواطي

Labels: , , ,

posted by EXzombie at 7:49 AM | link | 4 comments

The Power of Music

for the sake of Ramadan and the fact that people won't have enough energy to apprehend or read my post... did you get that... NO....!!!

OK... I'll stick to equations

hypothesis: music can alter visual experience

proof: using a controlled agent i.e. an epic music in this case "Requiem for a tower"

test (A)

gayest clip ever found in you tube + epic music

Result:



a great action movie......!!!

test (B)

the most retarded show in history + epic music


Result:

just go here

worthy of Monty Python status.......!!!

ok, so on other notes music also have a dark side to it case in point:



so what if we played it backwords...



need a more clear one.. here is Eagles' Hotel California



now enjoy



I tryed to find something that'll make you cry, but being testing it on my self, I couldn't find something that'll make me cry, so be glad I'm giving you this



p.s. the post is not targeting the weak muslims with satanic music or messages, it's solely for the sake of entertainment

Labels: , , ,

posted by EXzombie at 2:30 AM | link | 4 comments

Monday, September 01, 2008

شحقة نظارة شمسية بالظلمة......؟!؟


كما وعدناكم

هذي راح تكون الحلقة الاولى من حلقات اختراعات لم تغير وجه الحياة على الكرة الارضية

GLOW IN THE DARK SUNGLASSES


و الاختراع الي يايبه لكم اليوم اهو نظارة شمسية تشب بالظلمة.....!!!؟


طبعا ما ادري ليش ما قدروا يربطون بين كلمة شمس و كلمة ظلمة، يعني نظارة شمسية شحقه البسها بالظلمة ما ادري، بعدين شكلها بالمجمل مسخرة.....!!!؟

Labels: , , ,

posted by EXzombie at 6:30 AM | link | 20 comments